Илона Кәыҵниаҧҳа: «Насыҧ ҳаман, аҧсуаа дҳаман Ахада»
Усҟан, нанҳәамза аҵыхәтәантәи амшқәа рзы гәырӷьаҽҳәаша аҳауа иалан... Уи аӡбахә ала изакәызаалак акы здыруазгьы, алаҧш адыркырҳәа ишәозшәа, рацәак иалацәажәомызт. Бжьааҧнык еиҧш сааит акультура аминистррахь усура ҳәа. Ҳаиҳабы Логәуа Нугзар зегьы суадаҟны шәеизаны ателербага аҿашәк иҳәеит. Анцәа иныс, иахьа уамак сахаанхозаап сгәахәит! Минуҭқәак рышьҭахь ишиашо ицоз аефир ала аршанхага жәабжь! Аҭелқәа ҿааихак рымамызт! Агәырӷьаратә еифориа амҽхак есааира иҭбаахо аминистрцәа Реилазаара иҩназ зегьы ҳдәылнаган ҵаҟа ашҭаҿы ҳаизнагеит. Зылабжыш зызнымкылоз ҳрацәаҩын... Уи аҽны еилых-еилаҵа ҳамамкәа ҳаӡәын... Сааҭыбжак ала унацәа узрывҵамҵо жәлар иҭдырҭәааит Ахақәиҭра ашҭа! Уи аҽны иадҳәаланы хаан исхамышҭуа схаҿы инхаз асахьақәа иреиуоуп Ахақәиҭра ашҭахь данааиуаз Сергеи Багаҧшь... Ажәлар неилыҵ-ааилыҵны амҩа иҭаны рнапқәа дырххон инапы имырхразы. Еснагь ашьхеибаркыра асахьа зхыскаауаз уажәык уамашәа деинаалан, уажәык зынӡа жәлар дыртәын, уажәык зынӡа ихьыӡ ҩеиҵәҟьеит! Зыуаҩреи, зҟазшьеи, зыҧсабаратә аамсҭашәареи акры зҵазкуаз ароль нанагӡаз Ахада! Асҟаамҭа уззыҧшыз уанахаанхо, зыгәрагара уцәыцәгьаз агәырӷьара алабҿаба ианубо иацу ацәанырра ахҳәаа аҭара цәгьоуп, аха насыҧ сымазаарын! Нанҳәамза 26 аҽны сыҧсадгьыл знысыз аҭоурыхтә рыцхә агәҭаҵәҟьа сгылан, шаҳаҭра азуа! Насыҧ ҳаман аҧсуаа, дҳаман Ахада!

Аҟәа, 26 ѴІІІ 2018
comments powered by HyperComments

comments powered by HyperComments
СМОТРИТЕ ТАКЖЕ:
Ещё
Made on
Tilda